Payment Systems

Regolamenti

Bl‑emendi fl‑Att tal‑Bank Ċentrali ta’ Malta, li daħlu fis‑seħħ b’effett mill‑1 ta’ Ottubru 2002, il‑Bank Ċentrali ta’ Malta ngħata r‑responsabbiltà għas‑sorveljanza u r‑regolazzjoni tas‑sistemi ta’ pagament li joperaw f’Malta. L‑Att kif emendat jistabbilixxi wkoll bħala għan tal‑Bank, il‑promozzjoni u l‑parteċipazzjoni tiegħu fit‑twaqqif f’Malta ta’ sistema ta’ pagament soda u effiċjenti.

Sistema ta’ pagament hi definita fl‑Att bħala arranġament formali, bejn tlieta jew iżjed parteċipanti, b’regoli komuni u arranġamenti standardizzati, għat‑twettiq ta’ ordnijiet ta’ trasferiment bejn il‑parteċipanti, inkluża clearing house. Din hi wkoll mezz formali għas‑saldu ta’ pagamenti relatati ma’ titoli. Din is‑sistema, li għandu jkollha l‑approvazzjoni tal‑Bank, tista’ tinkludi sistema ta’ pagament, ta’ kklerjar, ta’ saldu, ta’ nnettjar u/jew sistema simili. L‑Att jipprovdi li l‑Bank jista’ wkoll, abbażi ta' każ b'każ, jaħtar bħala sistema ta’ pagament, arranġament formali bħal dan bejn żewġ parteċipanti jekk il‑Bank jidhirlu li dan ikun ġustifikat għal raġunijiet ta' riskju sistemiku. Iżjed informazzjoni relatata mad‑Direttiva 2007/64/KE dwar servizzi ta' pagament fis‑suq intern hi disponibbli hawn.


Direttivi tal‑Bank Ċentrali ta’ Malta relatati ma’ Sistemi ta’ Pagament


Il‑Bank Ċentrali ta' Malta ħareġ id‑Direttivi li ġejjin fir‑rigward tas‑sistemi ta’ pagament:


Direttiva Nru 1: Il‑Provvista u l‑Użu ta’ Servizzi ta’ Pagament

Din id‑Direttiva tittrasponi t‑Titli III u IV tad‑Direttiva 2007/64/KE tal‑Parlament Ewropew u tal‑Kunsill tal‑UE tat‑13 ta’ Novembru 2007 dwar servizzi ta’ pagament fis‑suq intern, komunement imsejħa Direttiva dwar is‑Servizzi ta’ Ħlas (PSD).

Id‑Direttiva tistabbilixxi regoli dwar it‑trasparenza tar‑rekwiżiti fir‑rigward tal‑kundizzjonijiet u l‑informazzjoni għal servizzi ta’ pagament, u d‑drittijiet u l‑obbligi rispettivi tal‑utenti tas‑servizzi ta’ pagament u tal‑fornituri tas‑servizzi ta’ pagament fir‑rigward tal‑provvista ta’ servizzi ta’ pagament bħala okkupazzjoni regolari jew attività tan‑negozju regolari.


Direttiva Nru 2: Sistema ta’ Pagament u Saldu ta’ Titoli

Din id‑Direttiva tapplika għall‑operazzjoni ta’, u għall‑parteċipazzjoni f'sistemi domestiċi ta' pagament u saldu ta' titoli, kif ukoll għal kwalunkwe forma oħra ta' transazzjonijiet bi flus jew titoli, kemm domestiċi kif ukoll transkonfinali, li jistgħu jkunu involuti fihom. Id‑Direttiva hi maħsuba biex tnaqqas ir‑riskji legali u sistemiċi relatati mal‑parteċipazzjoni f’sistemi ta’ pagament u ta’ saldu ta’ titoli, u biex tnaqqas kemm jista’ jkun l‑interruzzjoni tas‑sistema li tista’ tkun ikkawżata minn proċeduri ta’ insolvenza kontra parteċipant ta’ dik is‑sistema.

Direttiva Nru 3: Sostitwita bir‑Regolament 924/2009/KE


Direttiva Nru 4: Sostitwita bid‑Direttiva 2007/64/KE


Direttiva Nru 6: Kundizzjonijiet Armonizzati għal Parteċipazzjoni fit‑TARGET2‑Malta

Din id‑Direttiva tikkostitwixxi l‑kuntratt li jorbot legalment, li jistabbilixxi l‑qafas legali għall‑parteċipazzjoni fis‑sistema komponenti TARGET2‑Malta. Din tipprovdi l‑kriterji tal‑aċċess għal parteċipazzjoni diretta u indiretta u għall‑proċedura tal‑applikazzjoni, flimkien mal‑provvista ta’ dettalji dwar l‑obbligi tal‑partijiet, il‑maniġġ ta’ kontijiet tat‑tip Payment Module u l‑ipproċessar ta’ ordnijiet ta’ pagament skont l‑istandards tas‑SWIFT. Id‑Direttiva tinkludi wkoll deskrizzjoni ta’ karatteristiċi mhux obbligatorji ta’ maniġġ tal‑likwidità b’deskrizzjoni qasira tal‑pagamenti fl‑ambitu tas‑sistema, u tistabbilixxi r‑rekwiżiti tas‑sigurtà u ta’ kontinġenza.       


Direttiva Nru 7: Provvista ta’ Kreditu Intraday (kreditu limitat għall‑istess jum)

Din id‑Direttiva tistabbilixxi l‑qafas għall‑provvista ta’ kreditu intraday għal entitajiet eliġibbli.


Direttiva Nru 9: Ġbir ta’ Informazzjoni – Irrevokata fis‑6 ta’ Frar 2012


Proċess ta’ Applikazzjoni

Il‑Bank Ċentrali ta’ Malta, bħala l‑awtorità responsabbli għas‑superviżjoni u r‑regolazzjoni tas‑sistemi ta’ pagament, jiġbed l‑attenzjoni tal‑persuni kollha, korporattivi jew le, li bħalissa qed joperaw, jew li biħsiebhom joperaw sistema ta’ pagament f'Malta (kif definita fl‑Att tal‑Bank Ċentrali ta’ Malta), li dawn l‑operazzjonijiet jeħtieġu l‑approvazzjoni u l‑awtorizzazzjoni skont l‑Att tal‑Bank Ċentrali ta' Malta. Mistoqsijiet u applikazzjonijiet għal approvazzjoni u awtorizzazzjoni għandhom jiġu indirizzati lill‑Maniġer, Regulation and Oversight Office.

Introduzzjoni għall‑Proċess ta’ Applikazzjoni li Jwassal għall‑Approvazzjoni ta’ Sistema ta’ Pagament

Formola ta’ Applikazzjoni għal Sistemi ta’ Pagament


Awtorità Kompetenti għas‑SEPA 

Il‑Bank Ċentrali ta’ Malta nħatar bħala l‑Awtorità Kompetenti għall‑implimentazzjoni tas‑SEPA f’termini tar‑Regolament tal‑UE 260/2012.


Awtorità Kompetenti għar-Regolament dwar it-Tariffa tal-Interkambju

Il‑Bank Ċentrali ta’ Malta nħatar bħala l‑Awtorità Kompetenti għar-Regolament dwar it-Tariffa tal-Interkambju f'termini tar-Regolament tal-UE 751/2015, bis-saħħa tal-Avviż Legali 326 tal-2015.