22/10/2026 12:55:00

Il- Viċi Gvernatur tal-Bank Ċentrali ta' Malta tipparteċipa fil-Laqgħat Annwali tal-2026 tal-FMI u tal-Bank Dinji

Il-Viċi Gvernatur tal-Bank Ċentrali ta' Malta, is-Sinjura Rita Schembri, ipparteċipat fil-Laqgħat Annwali tal-2026 tal-Fond Monetarju Internazzjonali (FMI) u l-Grupp tal-Bank Dinji (WBG), li saru f'Bangkok, it-Tajlandja, mit-12 sat-18 ta' Ottubru 2026.

Il-Laqgħat Annwali jlaqqgħu flimkien istituzzjonijiet finanzjarji internazzjonali, gvernaturi tal-banek ċentrali, ministri tal-finanzi, esperti tal-iżvilupp, kif ukoll rappreżentanti tas-soċjetà ċivili u tas-settur privat minn madwar id-dinja biex jiddiskutu żviluppi ekonomiċi u finanzjarji globali ewlenin.

Matul iż-żjara tagħha, is-Sinjura Schembri ltaqgħet mad-Diretturi Eżekuttivi tal-FMI u l-Bank Dinji li jirrappreżentaw lil Malta. Saru wkoll diskussjonijiet ma' rappreżentanti ta' aġenzija ta' klassifikazzjoni ewlenija u għadd ta' istituzzjonijiet finanzjarji fis-settur privat.

Kienet preżenti wkoll delegazzjoni mill-Ministeru għall-Finanzi, immexxija mill-Ministru Clyde Caruana.

Dawn il-laqgħat ipprovdew pjattaforma importanti għall-iskambju ta' fehmiet dwar il-prestazzjoni u l-prospetti ekonomiċi ta' Malta, kif ukoll dwar żviluppi ekonomiċi u finanzjarji reġjonali u globali. Id-diskussjonijiet iffukaw fuq ir-reżiljenza mhux uniformi tal-ekonomija internazzjonali, l-opportunitajiet u l-isfidi assoċjati mal-Intelligenza Artificjali, il-kwistjonijiet ta' sostenibbiltà fiskali, il-"Pjan ta' Azzjoni ta' Bangkok" għall-Ġlieda kontra l-Frodi Ċibernetika fil-Finanzi Diġitali kif ukoll l-implikazzjonijiet tax-xokk reċenti fil-prezzijiet tal-enerġija fuq il-politika monetarja u s-swieq finanzjarji.

Il-parteċipazzjoni tas-Sinjura Schembri affermat mill-ġdid l-impenn tal-Bank Ċentrali ta' Malta li jżomm impenn qawwi mal-komunità finanzjarja internazzjonali u kkontribwixxa għal djalogu kontinwu dwar kwistjonijiet li jsawru x-xenarju ekonomiku globali.

Lura lejn l-Arkivju