07/03/2022

Il-Bank Ċentrali ta’ Malta jippubblika tagħrif annwali dwar il-falsifikazzjoni tal-karti tal-flus tal-euro f’Malta

Fit-tieni nofs tal-2021 ġew irrappurtati lill-Bank Ċentrali ta' Malta 150 karta tal-euro falza, prattikament ekwivalenti għall-ammont irreġistrat matul l-ewwel nofs tal-istess sena.

B'hekk, għas-sena 2021, l-ammont totali ta' karti tal-flus foloz irtirati miċ-ċirkolazzjoni laħaq it-305 karti tal-flus, li huwa l-iktar ammont baxx li qatt ġie rreġistrat f'Malta sa mid-dħul tal-euro fl-2008.

Meta mqabbel mal-għadd ta' karti tal-euro ġenwini maħruġin għaċ-ċirkolazzjoni f'Malta matul l-2021 (ftit ogħla minn 25.59 miljun bħala medja), il-proporzjon ta' karti tal-flus tal-euro foloz għadu insinifikanti.

Fil-livell ta' 0.09%, il-proporzjon ta' Malta fl‑għadd totali ta' flus foloz interċettati fiż‑żona kollha tal-euro matul l-istess perjodu (li jammontaw għal 347,000 karta) kien ukoll inqas mill-proporzjon ta' Malta tal-kapital tal-BĊE li jammonta għal 0.1049%.

Mill-karti kollha tal-flus tal-euro foloz maqbuda f'Malta matul l-2021, id-denominazzjonijiet tan-nofs jibqgħu l-iktar denominazzjonijiet iffalsifikati. Il-karti tal-€20 u tal-€50 esperjenzaw żieda żgħira matul l-2021 u flimkien kienu jammontaw għal 73.5% tal-flus foloz kollha interċettati. Matul dan il-perjodu, il-proporzjon tal-karti tal-flus foloz tal-€5 u tal-€10 żdied, filwaqt li l-ebda karta tal-flus falza ta' denominazzjonijiet ogħla ma ġiet interċettata.

It-tabella li ġejja tipprovdi distribuzzjoni perċentwali skont id-denominazzjonijiet tal-ammont totali ta' flus foloz irtirati miċ-ċirkolazzjoni matul l-2021, imqabbla ma' dawk irtirati fiż-żona tal-euro kollha kemm hi.

		€5	€10	€20	€50	€100	€200	€500
Distribuzzjoni Perċentwali	Żona tal-Euro	2.4	15.7	32.1	33.8	9.5	5.5	1.0
	Malta	12.1	9.5	35.1	38.4	4.9	-	-

Minkejja l-livell baxx ta' flus foloz irrapportati lokalment, il-Bank Ċentrali ta' Malta jibqa' jwissi lill-pubbliku biex joqgħod attent meta jagħmel tranżazzjonijiet bi flus kontanti hekk kif fix-xhur li għaddew kien hemm żieda fin-numru ta' karti tal-flus foloz ta' kwalità baxxa li ġew irtirati miċ-ċirkolazzjoni. Fil-każijiet kollha, kien faċli sabiex jiġu identifikati għaliex għandhom imitazzjonijiet foqra tal-karatteristiċi tas-sigurtà.

Il-karti tal-flus ġenwini jintgħarfu faċilment permezz tat-test "FEEL-LOOK-TILT" kif spjegat fuq is-sit elettroniku tal-Bank Ċentrali ta' Malta. Il-Bank hu disponibbli biex jipprovdi kull tip ta' għajnuna, inkluż taħriġ, lil kwalunkwe entità lokali li tista' teħtieġ din l-assistenza.

Kull min jirċievi karta tal-flus suspettuża għandu jċempel lill-Pulizija fuq 2294 2120 jew lill-Bank Ċentrali ta' Malta fuq 2550 6012/13, jew jibgħat e-mail lill-Bank.

Lura lejn l-Arkivju