25/03/2026 08:27:00

Tagħrif annwali dwar il-falsifikazzjoni tal-karti tal-flus tal-euro f’Malta

L-għadd ta' karti tal-flus foloz irtirati miċ-ċirkolazzjoni naqas matul l-2025. Matul is‑sena ġew ippreżentati total ta' 1,097 karta tal‑flus falza fil‑Bank Ċentrali ta' Malta, li jirrappreżentaw tnaqqis konsiderevoli ta' 29.9% meta mqabbel mal‑2024.

Il-proporzjon ta' karti tal-flus tal-euro foloz għadu insinifikanti meta mqabbel mat-30.22 miljun karta tal-flus tal-euro ġenwini fiċ-ċirkolazzjoni f'Malta fl-2025.

Fost l-1,097 karta tal-flus falza tal-euro maqbuda f'Malta matul l-2025, id-denominazzjonijiet tan-nofs baqgħu l-iktar iffalsifikati. Madankollu d-denominazzjoni tal-€20 tilfet l-importanza tagħha, filwaqt li żdied il-proporzjon tad-denominazzjoni tal-€50. Flimkien, dawn iż-żewġ denominazzjonijiet kienu jammontaw għal 87.5% tal-karti tal-flus foloz maqbuda. Il-proporzjon tad-denominazzjonijiet aktar baxxi (€5 u €10) naqas ukoll, filwaqt li l-perċentwal tal-ogħla denominazzjonijiet baqa' baxx ħafna.

It-tabella ta' hawn taħt tipprovdi analiżi perċentwali skont id-denominazzjoni tal-għadd totali ta' flus foloz irtirati miċ-ċirkolazzjoni f'Malta matul l-2025, imqabbla mad-distribuzzjoni skont id-denominazzjoni fiż-żona tal-euro kollha. Ta' min jinnota li filwaqt li d-denominazzjoni tal-€20 tiddomina f'Malta, dik tal-€50 hija l-aktar karta tal-flus tal-euro falza misjuba fiż-żona tal-euro.

		€5	€10	€20	€50	€100	€200	€500
Sehem perċentwali	Żona tal-Euro	1.4	6.4	27.0	53.2	7.9	3.3	0.8
	Malta	1.8	7.2	50.1	37.4	3.1	0.4	0.0

Minkejja ċ-ċifri baxxi ta' karti tal-flus foloz irrapportati lokalment, il-Bank Ċentrali ta' Malta jibqa' jwissi lill-pubbliku sabiex joqgħod attent meta jħallas u jitħallas bi flus kontanti. Il-biċċa l-kbira tal-karti tal-flus foloz huma faċli biex jiġu identifikati peress li ma għandhom l-ebda karatteristika ta' sigurtà, jew għandhom biss imitazzjonijiet fqar ta' dawn il-karatteristiċi.

Il-karti tal-flus ġenwini jistgħu jintgħarfu faċilment permezz tat-test "FEEL-LOOK-TILT" kif spjegat fuq is-sit elettroniku tal-Bank. Il-Bank huwa disponibbli biex jipprovdi kull tip ta' għajnuna, inkluż taħriġ, lil kwalunkwe entità lokali li tista' teħtieġ din l-assistenza.

Kull min jirċievi karta tal-flus suspettuża għandu jikkuntattja lill-Pulizija fuq  (+356) 2294 2120 jew lill-Bank Ċentrali ta' Malta fuq  (+356) 2550 6012/13, jew permezz  tal-e-mail.

Lura lejn l-Arkivju