• Home
•  
• Arkivju tal-Aħbarijiet
•  

Il-Bank Ċentrali ta’ Malta jaġġorna d-Direttiva Nru 19

Il-Bank Ċentrali ta' Malta llum ippubblika  test aġġornat  tad-Direttiva Nru 19 dwar l‑użu ta' ċekkijiet u drafts bankarji. Id-Direttiva tistabbilixxi l-qafas regolatorju li jirregola l-użu ta' ċekkijiet u drafts bankarji fejn il-pagatur, il-benefiċjarju u l-istituzzjonijiet regolati li jissorveljaw l-istrumenti bbażati fuq il-karti jinsabu kollha f'Malta.

It-test aġġornat jintroduċi diversi reviżjonijiet immirati lejn it-tisħiħ tal-qafas li jirregola l-istrumenti ta' pagament ibbażati fuq il-karti u l-appoġġ għall-bidla kontinwa lejn metodi ta' pagament aktar sikuri u effiċjenti. B'mod partikolari, l-emendi jipprevedu żieda fil-valur minimu għall-ħruġ ta' ċekkijiet, tnaqqis fil-perjodu ta' validità taċ-ċekkijiet, u d-depożitu obbligatorju ta' ċekkijiet f'kont ta' pagament.

Dawn il-bidliet jiffurmaw parti mill-isforzi kontinwi tal-Bank biex jiżgura li l-qafas jibqa' ċar, effettiv u allinjat mal-prattiċi ta' pagamenti li qed jevolvu u l-iżviluppi teknoloġiċi fil-qasam tal-pagamenti.

Id-dispożizzjonijiet aġġornati ser jidħlu fis-seħħ fl-1 ta' Jannar 2027. B'hekk jippermettu żmien biżżejjed biex l-istituzzjonijiet regolati u l-klijenti jadattaw għar-rekwiżiti l-ġodda.