31/12/2025 11:50:00

Gvernatur ġdid għall-Bank Ċentrali ta’ Malta

Il‑President ta' Malta, fuq parir tal‑Kabinett tal‑Ministri, ħatar lis‑Sur Alexander Demarco bħala Gvernatur tal‑Bank Ċentrali ta' Malta għal perjodu ta' ħames snin, b'effett mill‑1 ta' Jannar 2026. Is-Sur Demarco ġie approvat bħala Gvernatur unanimament mill-Kumitat Parlamentari għall-Ħatriet Pubbliċi.

Is-Sur Demarco serva bħala Deputat Gvernatur tal-Bank Ċentrali ta' Malta mill-1 ta' Jannar 2014, inizjalment responsabbli għall-Istabbiltà Finanzjarja, fejn kien ukoll membru tal-Bord Superviżorju tal-Bank Ċentrali Ewropew (BĊE) tal-Mekkaniżmu Superviżorju Uniku. Minn Awwissu 2017 ġie assenjat l-irwol ta' Deputat Gvernatur responsabbli għall-Politika Monetarja. F'dan l-irwol jakkumpanja u jaġixxi bħala sostitut għall-Gvernatur fil-laqgħat tal-Kunsill Governattiv tal-Politika Monetarja tal-BĊE.

Bejn l-1 ta' Awwissu 2024 u l-31 ta' Lulju 2025, is-Sur Demarco serva bħala Aġent Gvernatur tal-Bank, u pparteċipa bħala membru votanti tal-Kunsill Governattiv tal-BĊE. Matul dan il-perjodu ppresieda wkoll il-Bord Konġunt għall-Istabbiltà Finanzjarja.

Preċedentement, is-Sur Demarco okkupa l-kariga ta' Kap tad-Dipartiment għall-Istabbiltà Finanzjarja. Is-Sur Demarco ngħaqad mal‑Bank Ċentrali ta' Malta fl‑1984 u qatta' ħafna mill‑karriera tiegħu fid‑Dipartiment għar‑Riċerka Ekonomika, fejn ħadem bħala ekonomista ewlieni qabel ma nħatar Kap tad‑Dipartiment tal‑Unjoni Ewropea u r-Relazzjonijiet Internazzjonali. Tul il‑karriera tiegħu, kellu rwol ewlieni fl-iżvilupp tal‑ewwel mudell ekonometriku tal‑Bank u kien responsabbli għat‑tbassir makroekonomiku tal‑Bank.

Kien involut b'mod attiv fit-tħejjijiet u n-negozjati ta' Malta għas-sħubija fl-UE, kif ukoll fl-aspetti tal-politika tar-rata tal-kambju relatati mal-parteċipazzjoni ta' Malta fil-Mekkaniżmu tar-Rata tal-Kambju (ERM II) qabel ma Malta ssieħbet fl-Eurosistema. Is-Sur Demarco ppubblika wkoll diversi artikli fil-pubblikazzjonijiet tal-Bank.

Huwa ggradwa B.A. (Hons) fl‑Ekonomija mill‑Università ta' Malta, u ggradwa b'grad ta' distinzjoni mill‑Università ta' Warwick, fir‑Renju Unit, b'Masters fi Xjenza fl-Ekonomija, fejn speċjalizza fil‑qasam tal‑Ekonomija Monetarja Internazzjonali u l‑Kummerċ Internazzjonali.

Lura lejn l-Arkivju