28/03/2023

Il‑Bank Ċentrali ta’ Malta jappoġġja l‑ewwel edizzjoni tal‑ANZAC Day Beach Sprints Regatta

Waqt konferenza stampa li saret fil‑25 ta’ Marzu 2023 f’Marsaxlokk, il-Gvernatur tal-Bank Ċentrali ta’ Malta, il-Professur Edward Scicluna, flimkien mar‑Rettur tal-Università ta’ Malta, il‑Professur Alfred Vella, u Ms Rebekah Caruana, President tal‑Klabb tal-Qdif tal-Università ta’ Malta, nedew tmien dgħajjes ġodda tal-qdif għall-ewwel edizzjoni tal-ANZAC Day Beach Sprints Regatta. 

Permezz tal‑Fond tiegħu, imwaqqaf f’Jannar 2022, il‑Bank Ċentrali ta’ Malta qed jappoġġja dan l‑avveniment permezz ta’ sponsorship għax‑xiri ta’ żewġ dgħajjes C2X u mqadef.

Dawn id-dgħajjes ser jintużaw kemm għat-taħriġ tal-ekwipaġġ Malti kif ukoll għar-Regatta; filwaqt li ser ikunu jippermettu wkoll tiġrijiet doubles bejn sessi mħalltin u tiġrijiet ta’ kapaċitajiet imħalltin. B’hekk ikunu qed jagħtu opportunità liż-żgħażagħ taħt it-tmintax-il sena sabiex jipprattikaw sport li jistgħu jkompluh waqt li jistudjaw fl-Università. Dan bil-għan li jitneħħa l-kunċett li l-isports u l-edukazzjoni huma f’kompetizzjoni ma’ xulxin. Din ir-Regatta ser issir f’Malta kull sentejn, bl-edizzjoni tas-sena d-dieħla ssir fl-Awstralja jew fi New Zealand. 

 

Waqt il-konferenza stampa, il‑Gvernatur Scicluna sostna li “Permezz ta’ investiment bħal dan fis‑settur sportiv, l‑għan tal‑Bank Ċentrali ta’ Malta, flimkien ma’ dak tal‑organizzaturi, hu li jippromwovi l‑isports fost iż‑żgħażagħ, jgħolli l‑profil ta’ Malta bħala destinazzjoni għall‑qdif mal-kosta, u li Malta tiġi rreklamata fuq livell internazzjonali permezz tal-parteċipazzjoni ta’ gruppi mħallta bejn is-sessi fil-qdif.”

Lura lejn l-Arkivju